فين هو الاكل يا روحى..
لجل ادخل فيه وأفوت..
اطباقك كلها فاضيه..
طب فين أكلك محطوط..
أل جايبه وزه وبطه...
دا ساعتها شارون حيموت..
لو فكرتى فى عزومه..
تسرقى من نور كتكوت..
وتقولى عليه ديك رومى...
وتجيبى حِلَلْ وطشوت...
لجل ما تمليهم ميَّه..
وتقولى دى شوربه وشوط...
دانتى شفتى بساريايا...
قولتى لى يا لهوى دى حوت...
ما عمرك شفتى البلطى...
أو شفتى فى يوم قرموط...
أبخل من بُخَلاَ الجاحظ...
بخلك فيكى مربوط..
مشهور بخلك فى العالم...
من كوريا لحد اسيوط...
من يوم ما عرفت جنابك...
جسمى أصبح مشفوط..
كان نفسى فى حبة دُقَّه...
قلتى لى طب بشروط...
اقطم من ودنك حته...
وتعدى بحور وشطوط..
يا حبيبتى طب من إمتى...
مخك كان يوم مضبوط...
دانتى كوكتيل مناخوليا...
مع أقوى جنان مخلوط...
أموله ياناس مجنونه...
وكمان مخها مخبوط...
يحيى زكريا
.
.
الاثنين, 16 ابريل, 2007
الاثنين, 16 ابريل, 2007
وياريت يا ايهاب يا اخويا...
فالحين فى غسيل وطبيخ...
لو يسلقوا بيضه فى كنكه...
يبقوا طلعوا المريخ...
لو عملوا ف مره فريك...
يملوا لنا الدنيا صريخ...
بعديها الله لا يوريك...
نقضيها جبنه وبطيخ...
ويقولوا الحر طويل...
مش عاوز كُتْر طبيخ...
كلها حركات تمثيل...
لجل يداروا التلبيخ...
اموله يا روحى كفايه...
بطلى شغل الطاخ طيخ...
حطوا لخيبتكو نهايه ...
خلليتوا حياتنا فسيخ...
خدنى يا ايهاب يا حبيبى...
للقمر البولنديه...
ما خلاص انا شفت نصيبى...
ويا النايبه العربيه...
فاكره نفسها يا ايهاب...
مافى غيرها لو فى اوربا...
خلِّت ايامى هباب...
دى مصيبه واكبر كُبَّه...
يحيى زكريا
الاثنين, 16 ابريل, 2007
بتهيصى ليه بلا خيبه...
دانتو أحوالكو عجيبه...
أخيب م الخيبه وبرضو...
عاملالنا هيصه فى طيبه...
عمركو ما فلحتوا فى حاجه...
إلا فى نميمه وغيبه...
تقدروا على رغى وزن...
تملوا ولا ألف زكيبه...
عمركوا ما مشيتوا فى حاجه...
إلا وعملتوا مصيبه...
وان قلنا اسكتوا واتهدوا...
حنلاقى دموعكو قريبه...
عاوزينا من غير صوت...
ما نزعق ونقول عيبه...
وان واحده غلطت تعمل...
عيانه وعاوزه طبيبه...
واجروا وهاتوا الادويه...
اعصابها سابت سيبه...
نازلين بعزقه فى فلوسنا...
مانتو فاكرينها نهيبه...
وان قلنا حنبعد عنكم...
تبكوا وتعملوا ندِّيبه...
وان جينا لوقت فراق...
تحلفوا انكو حبِّيبه...
وتبوسوا تراب رجلينا...
وان كنا فى قلب زريبه...
الرجل ليكو نصيب...
بس انتم لينا نصيبه...
يحيى زكريا
الاثنين, 16 ابريل, 2007
فين هو الاكل يا حلوه...
بالذمه دا اسمه كلام...
عاملالى حكايه وغنوه...
عايشالى فى الاوهام...
جبتى لى فى راسى بارومه...
وصداع محتاج برشام...
أصنافك فين يا حبيبتى...
هاتيها بسرعه قوام...
جايبه ترابيزه كبيره...
فارده لمترين قدام...
كلها ع الفاضى يا روحى...
دنا حطلع فوقها وانام...
أطباق فاضيه ومرصوصه...
وحاجات زى الافلام...
عينى ما شافت كفتايه...
أو أى لحوم أغنام...
أو صحن وفيه رزايه...
أو حتى ريش لحمام...
أو حتى طعميايه...
أمولتى دا والله حرام...
إن قلت جعان تقوليلى...
ياللا نعيش فى الاحلام...
غمض عينك واتخيل...
قدامك ألف برام...
كله محمر ومشمر...
إهجم ياللا يا ضرغام...
وقتها يا حبيبتى عرفت...
مخك ترللى تمام...
***********
طب ليه بس يا أموله...
عامله هيصه وهُلِّيله...
بالكدب تقولى كريمه...
وانتى يا حبيبتى بخيله...
والبخل أصيل جواكى...
أبدا مش عاده دخيله..
لو تدى فقير ملحايه...
تفضلى صاحيه فى دى الليله...
تبكى بالدمع الغالى...
وتقولى خيبتى تقيله...
ضاعت أموالى يا عالم..
فين عقلى يا دى النيله...
بعزقت فى ثروة أهلى...
وحعيش العمر ذليله...
إزاى ارجَّع ملحايتى...
أه يا غلبى إيه الحيله...
أموله كفايه يا روحى...
خلليتى قلبى بليله...
مخك يا حبيبتى أهو طار...
واللى ف راسك شخليله..
يحيى زكريا
الاثنين, 16 ابريل, 2007
بأمارة إيه يا أمال...
عاملالى يا روحى فضيحه...
ما تخفى شويه اومَّال...
خلليكى يا حلوه صريحه...
عاملالى فيها كريمه...
وانتى فى الاصل شحيحه...
آل جايبه المشويات...
ومخلل ملو صفيحه...
طب كنتى اديتى وفاء...
من حلوك حتى شريحه...
دى بقالها سنين بتبات...
للاكل ما شمت ريحه...
قلت لها روحى لأمال...
قالت دى بخيله وإيحه...
**********
والليدى الحلوه وفاء...
م الجوع زى البؤساء..
منظرها مقطع قلبى...
عماله تقول واء واء...
أل إحنا آل كحيل...
إحنا وبس الكرماء...
يا حبيبتى خدى لك شقفه...
من كنافتكو العصماء...
دانتى حتقعى من الجوع...
بطنك م الاكل خواء...
ما تبطلوا فشر شويه...
الفشر دا أوحش داء..
**********
أل طيبه جايه حتشهد...
طب طيبه دى فى التوهان...
لو اقول لها اسمك ايه...
حتقول نيللى وشريهان...
مش فاكره فطرت إيه....
أو مين فى العيله جعان...
بتجيب الكرواسون...
تحشيه بفراخ الوان...
ولا عمرها جابت حته...
عاملالى فى مخى جنان...
*********
سموحه كمان ال قالت ...
ياللا نجيب الطلبات...
دى سماح لو تسقى القطه..
حتقولوا يهودى مات...
لو قلنا سماح غدينا...
رح ناكل تصميمات...
نفسى فى مره تعشينا...
ولا تبين كرامات...
*********
سمسمه من ساعة النادى...
على طول راحت لهولندا...
بس يوماتى تشوقنا...
أكلات من روسيا وكندا...
عماله تجرى فى ريقنا...
واخداها شغل معانده...
وف وقت الجد حتسقط...
ما حتلقى اى مسانده...
عاوزين غنوش الجوز...
والعالم أهية شاهده...
حتقول بردون يا حبيبى..
غنوش الجوز دا مناهده...
**********
يا أمال قلتى شاتوريان..
والجمبرى أل روبيان...
يا حبيبتى بجد خلاص...
عقلك كله بتنجان...
أل ايه انا جيت وأكلت..
يا عنيه ومش داريان...
أمورتى الحلوه نور...
منظرها ليه تعبان...
روح قلبى كلت الفوطه...
وقالت لى عاوزه كمان...
م الجوع تاكل فى هدومها...
مش فاضل غير فستان...
يا أمال العيله بحالها...
م الجوع جسمها نحلان...
وانتى يا حبيبتى قالولى...
على طول قلبك هفتان...
نازله لنا فشر وانتى...
فقر وحالك عدمان...
*******
يحيى زكريا
السبت, 07 ابريل, 2007
دستور يا اسيادى دستور...
ما خلاص عَدِّلنا الدستور...
لجل جنابك ويا جنابى...
نفضل عايشين نفس الدور...
انت حتفضل دايما جحش...
أما سيادتى فحبقى التُور...
أصل الوالى اللالى اللالى...
أبو دم خفيف وشحرور...
حيسلَّمنا لنونو الغالى...
النُّغَّه الحلو الأمور...
بس اوعى لسانك يتكحول...
أو تتكعبل فى المحظور...
حتلاقى جنابك متبهدل...
يا مدهول خلِّيك فرفور...
واعمل مش فاهم واستهبل...
والبس فوق راسك طرطور...
واهتف للوالى بصوت عالى...
والشبل الحلو الغندور...
وادخل فى الموكب واتموكب...
ولاَّ اتشعلق فى الحنطور...
والعن أبو أم معارضينه...
من إسنا لحد دمنهور...
والعن أبو خاشى ماتخشاشى...
بس لايمنى على الكستور...
واظهر فى المنظر واتمنظر...
وادخل جوه الجُوقَه ودُور...
قُل له الناس بتقول لجنابك...
عصرك عصر الهَنَا والنور...
إوعى تقول الناس تعبانه...
لو يتعشوا ما يلقوا فطور...
واقعد فى المجلس واتمجلس...
واتمحلس حتعيش فى سرور...
واعلن فى القاعه بمياعه...
إن مفيش واحد مقهور...
قول دى حكومه صحيح مهضومه...
زى السكر جوه الزور...
قول دى حكومه صحيح مظلومه...
والشعب دا كلب ومسعور...
وان قالوا الناس بره بتنزف....
إكدب واحلف ان دا كله كدب وزور...
واحلف ع النعمه وع الخِتمَه...
لجل تعيش دايما مستور...
قول الناس عايشين فى الراحه...
وبيفطروا كحك وبتى فور..
قول للوالى عشقك غالى...
والشعب فى حبك معذور...
يا مريَّشنا ومنعنشنا...
وبانى لنا فيللات وقصور...
بس سؤال واحد لجنابك...
مين هو الاستاذ دستور...
يحيى زكريا
<<الصفحة الرئيسية
.
.