إحنا الآسفين ع الازعاج ..

ما تتأسفش ..

وابعت كل سفاينك تضرب فينا ...

ما تتأخرش ..

موش رح تلقى أى مقاومه ..

ماحنا بقينا هياكل هايمه ..

آسف ...

قصدى بقينا نعاج ..

كل أسودنا بهلوانات ...

فى السيرك وفى المؤتمرات ..

وان كان فيه فى بلادنا ديابه ..

بيبقوا ديابه علينا وبس ..

لكن قدامك يا عزيز ...

يبقوا معيز ...

اللى ما نسمع ليهم حس ..

إبعت كل سفاينك تضرب فينا ..

ما تتأخرش ..

موش رح تلقى نمر يرد ...

موش رح تلقى كلاب بتعض ..

دى حتى كلابنا ..

ما بتهوهوش ..

ما تتأسفش ..

واضرب جو وبحر وأرض ...

مرمطنا بالطول والعرض ...

موش رح تلقى أى ملام ..

موش رح تسمع أى كلام ..

ماحنا لسانَّا عاوز قطعه ..

مالهوش لزمه ...

إتحطينا فى مليون أزمه ..

برضو لسانَّا ما بينطقش ...

ما تتأسفش ...

وابعت أسطولك ومارينزك ...

يتمشوا فى الوطن الأكبر ...

إخرسنا بقمحك وبجينزك ...

والكاتشب فوق الهامبورجر ..

واتمشوا فى شوارعنا الهاديه  ...

واغتصبوا عيشه مع ناديه ...

وان دوِّت فى الكون صرختهم...

مش رح نسمع ...

ماحنا كتير قوى ما بنسمعش ...

ما تتأسفش ...

أصل ودانَّا زينه ف روسنا ..

بنعلق فوقها النضاره ..

ولا نطرطر منها سيجاره ..

ولا ساعات الوالى الغالى ..

يحلاله يشد ويقرصنا ..

واحنا بنضحك ...

ايوه بنضحك زى الهبل ..

وما بنزعلش ...

ما تتأسفش ...

وابعت كوندا تمد قدمها ...

واحنا نبوس ...

وان كسرنا ف مره كلامها ..

إكتم فوق انفاسنا ودوس ...

وانهب بترولنا وخيراتنا ...

شردنا وخَرَّب فى بيوتنا ..

واسرق حتى كفن أمواتنا ..

إوعى تخاف تجرح كرامتنا ...

ماهى كرامتنا زى عدمها ...

بنبيعها بكرسى وبفلوس ..

إوعى تفكر يوم كرامتنا ..

ممكن تورم مره وتنقح ..

أصلها م النوع المطاطى ..

والوطاطى ..

مهما بيحصل..

 ما بتنقحش ...

ما تتأسفش ..

واعمل لنا قرآن يهدينا ..

واشتم فى كتابنا وفى نبينا ..

نَسِّينا الفرض مع السُنَّه ...

حتى ان قلت ان انت إلهنا ..

رح نسجد لك ..

رح نسجد لك وما نكفرش ..

ما تتأسفش ..

وادى معونه للى باعونا ..

واتحكِّم فى عيشتنا وقوتنا ..

فكَّرنا دايما بخيبتنا ...

ماحنا اللى فتحنالك بيتنا ...

قدَّامك كنا بنتسابق ..

لجل نعرى لك جتتنا ...

ليه مافهمش ..

كل الخلق ..

عقلها يوزن كيف وكم ...

واحنا يا خلق ..

حنعيش ونموت ...

واحنا يا عالم  ...

ما بنفهمش ..

ما تتأسفش ..