اليكى احن - مدونات جيران

ولما دنيتى قالت ..

زمان الحلم راح ولَّى ..

ولما شفت ..

زمانى خد ..

وما خلَّى ..

رسمت البسمه فوق وشى ..

عشان الناس تشوفها وبس..

أتارى البسمه مالها حس ..

ولا طعم ..

كأنها بدون ألوان ومرسومه ..

ومقسومه ..

على سنينى ..

ورغم إنى ساعات ياما ..

بجد بجد ..

بيبقى نِفْسى أعيش نَفْسى ..

ونِفسى احزن ولو ساعه ..

وموش قادر ..

عيون الناس ملاحقانى ..

وموش سايبانى اكون يحيى ..

وبستنى يجينى الليل ..

ورغم انه كتير جدا بروح ما يجيش ..

ولما يعود ..

بياخدنى ..

ويرسمنى خيال الضل ..

وبتشرنق ..

ويلفحنى هجير ضلِّى ..

ويحرقنى جحيم تلجى ..

ويدوشنى هدير صمتى ..

ولما ضلِّى يتململ ..

ومنى يمل ..

يروح لبعيد وينسانى ..

أعوز ابكى ..

ألاقى دموعى عاصيانى ..

وبحسد كل من يبكى ..

واقول يا بكره ياللى جى ..

اذا جتنى ولقيتنى حى ..

حتاخد منى ايه تانى ..

سنين العمر اهى مارقه ..

ومش فارقه ..

حعيشها ازاى ..

ولما المح شعاع الحلم ..

ماصدقشى ..

اقول دا بجد راح يطلع ..

أمل كاذب ..

وقبل ما ييجى راح يمشى ..

اقول جه غلطه فى العنوان ..

ورغم انى ..

بِقِى منى ..

يادوب حرفين ..

ونظرة عين ..

كتير شارده ..

بتسأل يا كل البشر ..

مكانى فين ..

ولما مش بتلقى رد ..

بعود تانى ..

أحط البسمه فوق وشى ..

ولُون الزهر فى حروفى ..

بخاف الناس تشوف خوفى ..

واعيش البسمه مالها حس ..

ولا طعم ..

كأنها بدون ألوان ومرسومه ..

ومقسومه ..

على سنينى ..

يحيى زكريا