تحيتى لجناب معاليك
انا من حبايبك موش اعاديك
عشان متقعدش تفكر
ولا مزاجك يتعكر
مقدمه يحيى الراضى
ضحيه م الزمن الماضى
مع انى هادى ومطاوع
ولا كنت غشاش وملاوع
ياريت جنابك تتذكر
يا حضرة السارى عسكر
انا لما قلتولى استفتا
ولا مره فكرت استفتى
وكنت م التسعه وتسعين
وتسعه من عشره موافقين
وكنت ماشى جنب الحيط
وكنت هادى ومتساهل
ولوأمين شرطه قابلنى
اقول يا باشا انت منور
ولما يشتم ويعور
اقول أكيد انى استاهل
عشان مقدمتش كرامات
مانا اصلى فقرى من يومى
وجيوبى منزوعه العملات
وعيلتى منزوعة الدولارات
وحياة جنابك ما بخرف
ولا مره فكرت استظرف
بيوليو قدمت مباركه
وبمايو باركت الحركه
بكل حرب انا اندبيت
ولا قلت إدونى مكافأه
ولا قلت عاوزأرض وبيت
ولما جه سيدنا الوالى
انا قلت وقتى حيحلالى
لقيت جنابه بيخدعنى
أخد فلوسى وجوعنى
وباع حصيرتى ولحافى
وشبشبى ومشيت حافى
ونسيت خلاص شكل اللحمه
والعضم قوس فى اكتافى
وشفت أكلى بيتسرطن
وخضارى حمضان ومعطن
سكت مفتحتش بقى
وفضلت اهتف للوالى
على راس ابونا تتسلطن
وشفت نيلى بيتلوث قلت كويس
أهى حاجه برضو تسلينا
وكله من فضل والينا
ولا قلت له ليه تإذينا
وتجيب فى دمى باولينا
وقلت اهاود واطاوع
ولاده ركبوا على ولادى
وصبحوم بهوات
وهو عيشنى حياتى
جوه الازمات
وخد فلوسى ورحلها ليهود خيبر
وبعدهانام واتمدد
ولا حس ولا حتى استغفر
نظيفه نضف لى جيوبى
وحرمنى حتى من توبى
سكت برضو كالعاده
وقلت غفران لذنوبى
ما انا اللى هنيت العسكر
فى يوم ما هجموا ع السلطه
وانا اللى ضيعت شبابى
على مصر ايام الورطه
وانا اللى كلبشنى الوالى
تلاتين سنه بحكم أونطه
تلاتين سنه عشت فى اوهام
بمصر جنه وكله تمام
ولا مره قلت ده قاعد ليه
لتنسبوا لى خراب مالطه
مع انه خربها زراعى
وبرضو خربها صناعى
بنوكها طارت وقطاعها
وباعها جمله وقطاعى
وماعدش باقى الا القلعه
وانا والحسين ويا الازهر
والسيد البدوى فى طنطا
شريفه بوظ إعلامى
وراح مكمل ع الشورى
وعز عزه بحديدى
وبان ولعلع فى الصوره
وسروره بدير المجلس
ببلطجى بسنجه وبلطه
ومصر كانت محروسه
خلوها مصر الموكوسه
خلوها مصر المحكومه
بعصابه سموها حكومه
ايدين بتسرق بمهاره
بدايتها ايد سيدنا الوالى
واخرها ايد شيخ الحاره
شعارها بين رشوه وكوسه
يامصر ضيعتى بحكامك
وانا اللى ضيعنى غرامك
ووالى خيب لى أمالى
وانا لو هسامح فى فلوسى
طب اعمل ايه فى دم عيالى
يا حضرة السارى عسكر
وعيلتك بتملك تلت أجنحه
جَنَاحُ المُبَاركِ مَا أكْبَرَهْ
جَنَاحُ العَلاَءِ مَا أزْهَرَهْ
جَنَاحُ الجَمَالِ بِكُلِّ الكَمَالِ
فَيَا للجَمَالِ بِبورْتو طُرَهْ
******
وقالوا بإنك ببورتو طره
وانك مصاحب الفين صديق
حرامى وقاتل وقاطع طريق
والفين منافق والفين ممثل
ونصاب وحاوى وصاحب بلاوى
وكله بياخد دروس من جنابك
وكله يا باشا بيعمل حسابك
وانك حلنجى واكبر لومانجى
وكل بطولاتك حدارجى مدارجى
وانك بتفرض عليهم اتاوه
ويوم الزياره تلم الحلاوه
ولسه بتصبغ وعايش شبابك
وكله مصدق حكاية جنابك
بأنَّكَ أنتَ العَزيزُ المُهَابْ
وَ أنَّكَ أنتَ القَوِىُّ المُجَابْ
وَ أنَّكَ صَاحِبُ أوَّلِ ضَرْبَهْ
وَ أنَّكَ تَحْظَى بِأرْوَعِ صُحْبَهْ
وَأنَّ الغَدَاءَ كَبَابٌ وكُفتَهْ
وَأنَّ العَشَاءَ دَجَاجٌ وَ شورْبَهْ
وَأنَّ عَلَيكَ جَميعُ الحِسَابْ
وَأنَّكَ تَمْلُكُ مَالاً وَفيرا
وَمَالُ المُبَارَكِ مَا أكْثَرَهْ
*******
وقالوا بإنك ببورتو طره
وعيشك جرايه وأكلك يمك
ومافى استاكوزا وما فى سمك
وان المدام للاداره اشتكت
لقلة ملاعب تنس أو راكت
وياما خلايق فى عهدك بكت
تمص فى دمانا وتعيش زى كسرى
وتفقر فى شعبك وتبعت سويسرا
تبيعنى لعدوى وربك ما يهمل
نهايتك ببورتو مهانه وحسره
وقالوا حتعمل هناك مجلسين
دا مجلس موافق ومجلس منافق
وكله لجنابك حيبصم آمين
جمالك جماله أمين السياسه
علاءك حلاوته تجاره وكياسه
لتهليب شعوبناوتنفيض جيوبنا
وكله يا باشا فى غاية الخباثه
وقالوا بإنك رفضت الهروب
عشان جوه بورتو حتقدر تتوب
وناوى ترجع لبلدك جنيه
يخفف شويه عليك الذنوب
وانك بتندر وندرك صريح
بلحظة رجوعك لعرشك مليح
حتبنى لشبابنا اللى ماتوا ضريح
سوا كان حسين ولا عبدالمسيح
ويدخل سياحه مع الاهرامات
ونبقى وفينا لكل اللى مات
وبرضو نكتر فى المليارات
واما اللى عاشوا حياخدوا مكافأه
حيقضوا حياتهم ببورتو طره
وَأنَّكَ تَحْيَا بِأمَلِ الرِجُوعْ
وَنَجْمُ جَنَابِكَ قَيْدَالسِطُوعْ
بِكُلِ الأذِقَّهْ وَكُلِ النِجُوع
لِتَشْبَع وَحدَكْ وَشَعْبٌ يَجُوعْ
مُحَمَّدٌ يَأبَى وَ يَأبَى يَسُوع
بِعَوْدَةِ مِصْرَ إلى المَسْخَرَه
وقالوا جنابك ببورتو طره
على أيامك السبعه
بدرت المسك والعنبر
زرعت الفل والريحان
وماخفتش من العسكر
وجبت بخور من الجاوى
انا الغاوى
وماكنتش فى يوم حاوى
بقلبى الحاوى أحلامك
كما الفتيان اذا تعشق
بقلب شغوف
ما تعرف خوف
وحصنتك برب الناس
من الخناس
وصنتك من عيون الناس
قضيت عمرى كما ددبان
على ايامك
وعشت احرس فى احلامك
بيوم سبتك ثبت قلبى
وانا بمنع صحاب السبت عن سبتك
وعن نخلك
وعن رملك
وعن نيلك
وقرآنك وانجيلك
وعن وردك
وعن وردك ومورودك
واصون تمرك
واقول امرك
ويوم حدك حفظت الحد لحدودك
وكنت الحمزه فى بدرك
وكنت على فى سينا
وماخفتش ولا اتخلفت
بيوم ما التقى الجمعين
بيوم الاتنين
وقلت شهاده أو نصرك
وانا بسجد صلاة عصرك
وانا مصعب بيوم أحدك
رفعت الرايه بيمينى
رفعت الرايه بشمالى
حضنت الرايه فى صدرى
وما كنتش من الاعراب
بيوم عسره
وكنت معاكى فى النكسه
وكنت معاكى فى مكه
وفى شدوان
وكنت معاكى يوم الفتح
ويوم النصر فى رمضان
وكنت معاكى فى العقبه
وكنت فى بيعة الرضوان
تلاتك جه وصحانى
على صرخة ولد ثاير
وداير فى ربوع ارضك
بيطلب حقه فى التعبير
وفى التغيير
وفى التحرير
لقيت الناس بتتظاهر
وده الظاهر
وموش ظاهر
غراب البين ومتخبى
واربع كان كما اربع
وحوش بيكى بتتربص
وشفت الشر فى ليلك بيترقص
وانا قلقان ومتقرفص
خميس بحرك بيتلاطم
وتتعاظم غيوم الهم
وما بتتلم أحزانك
وشفتك واقفه حيرانه
ما بين الزين
وبين الشين
ومين أوفى
ومين خانك
ومين سرطن محاصيلك
ومين خرب فى دكانك
ومين باعك برخص تراب
ومين حطك بزنزانك
وشفت ولادك القُصَّر
ما بين حجرين
ما بين أمنك وايمانك
وبين سعدك واحزانك
بجمعه حزينه غضبانه
وبهتانه ملامحها
وعمرى فى يوم ما اسامحها
وهربانه طيور سلمك
بقلب الريح
وفات الخوف
بسحنة غول
وانا مذهول
من المنظر
وبتحسر على ايامك
واشوفك ماشيه فى الطرقات
تشاهدى فعل اعدائك
بقلب جريح
دموعك نازله تتسلسل
تبلل توبك الازهر
وفجأه صحيتى يا غاليه
وهز الدنيا زلزالك
وصحصح ابنك الشارد
وبان فى الصوره كالمارد
لقيته فى الجموع هادر
كما العاديات ضبحا
كما المغيرات صبحا
وكالمدبرات أمرا
وصوته فى الفضا بيرن
بيرفض ذلك الابدى
وماعادشى صغير السن
بيفرض ع الجميع دستور
ومين غيره قانونه يسن
تعودى عالى احساسك
وشايله ابنك على راسك
وبسمع صوتك الشادى
لقد نجا لقد نجا لقد نجا
بجاد 3 سماكى ليه بتتلون بلون باهت وما عادت سما صافيه وبالعافيه شموسك طالعه ما تدفى ومتخفى قمر ليلك وحاجبه غيوم وما فى نجوم تنور لك وما فى ديك يصحيكى تصلى الفجر وما فى بلال على المدنه يأذن لك ويئذن لك ببدأ جهاد ومافى عناد بقلب ولادك الصاحيين قصاد الشات بيتواعدوا ويتعاهدوا وبشاهدوا بنات نجارك بيتعروا على الشاشات ووعاظك بفضائيات بيقروا فى سورة التحريم وعينهم رايحه ع الدولارات ونسونا سنن فرضك وابن مسعود مهوش موجود على أرضك وسعد معاذ الله اذا زارك وحكِّم فينا شرع الله ولا الفاروق فى يوم شفناه على عرشك وطولك ساح مع عرضك ونخلك خاويه أعجازه وتمره مر كالعلقم وحتى جريده ما غطى سقوف دارك بشوفك فى الغروب ساكنه ورمحك صدى م الركنه وبيدور على رامى وحتى سيفك الماضى صبح ماضى وتلم نصله م التفاهات وداخله عصر العولمه بالعولمه وبالشخاليل وبالصاجات فتحتى لعمرو أحضانك كما فتحت لمن سبقوا كما تفتح لمن يأتوا وفى الفسطاط خلعتى توبك السعدى وجسمك بان على الاغراب لبستى جينز أمريكى وألوانك بقت شفتشى وما بتختشى إيديكى نسيت الحنه ومن دمى بتتخضب وعيبى إنى موش بغضب عكاظك خالى م الشعرا ودار الندوه مقفوله ومبدوله بمجلس شعب مع شورى وما فى شعب ولا شورى وضاق الخُلقْ ومقهوره نفوس الناس بباب الخلق وفى مكه وفى العتبه وفى الطائف وباب اللوق وانا مخنوق وببكى عمر قضيته فى خط النار قصاد خيبر وبتحسر على الخلفاء و عقلى فاق على غير الراشدين فما نافقت يا حنظله ونحن الذين نافقوا وما أنفقوا سوى فى الانتخابات بشوفك فى الدروب صايعه وبايعه كل من صانك وقوادك رجال اعمال وانا حظى رقيق الحال وما عندى قصور كسرى وأكلى الملح والكسره ومتمرط فى ميكروباصات لانى موش من الأعيان ولا تاجرت مع عثمان برحلات الشتا و الصيف وما اتأمنت من خوف وما اتأمنت من جوعى وهمى شيلته فى ضلوعى وعز فى يوم ما صاحبنى ولا سابنى اعيش انسان وخلانى بنى قحطان أنا القحطان أنا الواقف على حدودك بصد الفرس والرومان وبسقى الزهر فى خدودك واوطى له واسمى عليه وبتكافئينى بجحودك باحوش بيجين وبتضميه وترمينى فى أخدودك لأنى فقير ببيع روحى فدا عِرضَكْ وبصلب عودك المتنى على متنى وماقلتش همومى كتير وآلمتنى ولا فكرت ابقى وزير لا انا صيفت فى ماراقيا ولا قلت احجزوا لى شاليه وللهرم رب يحميه وربى رب هذا البيت وما بيسكن فى بيت ابيض ولا أعبد ما تعبدون ورغم عيشتى وقهرها انا ما جبت أبرهه ولا هدِّمت فى الكعبه ولا دمرت فى الكوفه ولا شاركت فى اللعبه ولا صاحبت بن جوريون ولا ابن الصمه أو نيكسون ولا اتمحلست لواشنطن ولا موسكو ولا الطليان وابوسفيان بعد العُدَّه للبيعه وحيسلمنا لمعاويه معاويه راح يسلمنا لابنه يزيد يزيد ريس فى تاريخنا يزيد الهم فوق روسنا وفى دروبك بقيت هايم أنا الهايم بأشواقى وإشيمائى بتتقصع لكل غريب وبتوسع فى احضانها بتتقرب لأعدائى وبتبعتر فى أوراقى ومن لقيانا تتهرب وبتعاند وتتمنع واشوفك داخله ع الديسكو وبسمع صوتك الشادى انك لا تهدى الاحبه والله يهدى من يشاء
بتتباعدى وبتباعد ويبقى البين طريق سايد ومادد مد ورغم انا شِعاب واحد بتتسابق مضاربنا بدرب البعد نسيتى العشره والايام وحضنى الدافى والاحلام وكعبه كنا خدامها وقلعه سهرنا قدامها لحد الفجر وشفنا الصبح بيشقشق على جبينها ولفينا شوارعها ودُوبنا فى حواريها بقيتى ليه كما هند وجايبه وحشى يقتلنى وبتسنى فى أسنانك وانا ما قتلت يوم عُتْبه ولا اتعرضت لوليدك ولا تاجرت بالعتبه ولا فرطت فى جريدك انا العاشق لأحبابك وانا الحارس لأبوابك وانا الماسح لأعتابك وقلتى ان انا كافر أبحتى دمى فى الساحه و ع الطرقات كماين واقفه بتقفش وبتفتش على البطاقات وانا خايف أمين شرطه يوقفنى يفتشنى يبص فى مره فى بطاقتى ويعرفنى يساومنى يسلمنى ولا يتركنى وياخد منى ما أملك وما أملك ولا مسموح بإنى أبوح واقول عاشق ولكن موش على دينها ولا بقبل مريدينها ولا برتاح لنوابها وبكره كل أحزابها وبرفض عشقى ليكى يكون خاضع لإشرافك وبرفض عمرى لو هيكون خدام لأشرافك وبرفض قولك المجنون بإن عليكى انا اتحرمت وما حرمت ولا استحرمت عشقك يوم وبرفض دينك الغربى وبرفض كونى بين البين وبرفض سام يكون لى إمام ولو كان والده اسمه حسين وبرفض كونك التابعه وبرفض انى اكون فيكى مواطن م الفئه التاسعه وانا ضهرى مهوش مسندود لأى عامود ولا بعرف لواءاتك ولا عندى كمان صدِّيق بماله يجود ويعتقنى وأمى شهيدة جهل كسميه وانا عمار نطقت الكفر من قهرى وبمشى فى بنى سعدٍ الاقيها بنى بؤسٍ وانا مرعوب لوحشى ف يوم يهاجمنى ويرشق حربته فى كبدى وانا بيتى بلا أبواب وشباكى مالهش قزاز وما لى سلطه فى حكومتك وما لى غير رقم قومى وقومى موش من الاشراف بخاف لو افوت قصاد كراكون ألاقى عكرمه مأمور بإنه يجور على صاحبه وانا لا قوه ولا حول وأمن الدوله يتعبنى ويرعبنى اشوفك يوم كما جاريه بتتباعى وما أملك دنانيرك وانا شاعر وما لى الا اشعارى واشعارى ماهش للبيع ولا فكرت يوم أطْبع وبرفض انى أطَّبع وابوسفيان بغير لى هوياتى وانا رافض أعيش ليكى بإحساسى اللى متزور وما اتصور أغشك يوم ورافض أبقى م الحاشيه واعيش لى يومين واهى ماشيه وراضى بتوبى لو من خيش واعيش يومى بطابور العيش وفى أنبوبة البوتاجاز والانتخابات وأزمة غاز وراضى بدايرة الالغاز وفى التلفاز فريقنا فاز وجاب الكاس واشوفك ع المطار طالعه وفى ايديكى سعف أخضر وانا بتأمل المنظر طلع البدر علينا ... من ثنيات الوداع
ولو طاطت لا بتساقط ولا تشبع
وانا تايه صحاريكى
لانا بوصل ولا برجع
ورملك نار بتحرقنى
ورجل يمين بتتوجع
وفردة جزمه مقلوعه
وفردة كُمْ منزوعه
وفى حلقى مرار القهر واللوعه
وانا راجع وبتقهقهر
رميت سيفى اللى كان مسلول
وقربه ميه مقطوعه
وسيبت حصان ودرع قديم
لانه كان حصان روسى
ميعرفشى أصول الكر بالعربى
ونسرى الميج فى قلب الدشمه متكوم
بريش منتوف
وسيبت رمالك الحارقه
وايه هاخسر
سوى كسبنا سوى خسرنا
انا الخسران
سمعت أوامر القاده
وكالعاده
لقيتنى وسط جيش جرار
ومقطوره
ونمرتها سنين عجاف
و فى الترخيص نقل سيناء
الى خيبر
وفى الصوره أبوسفيان مع أبوجهل
وانا فى الصوره موش باين
قالولى كُرْ .. أنا كريت
ووسط التوهه أنا بصيت
لقيت خالد مهوش جنبى
بنو خيبر قالولى فر ما فريت
قالولى فر ما فريت
قالولى فر
انا فريت
وانا أعزل
وبين صمتى وألحانك
انا مزروع
وبين كُفرى وإيمانك
أنا المخدوع فى قوادك
سُراقه كان بيخدعنى
أخد منى مِيتِين ناقه
ولففنى ممراتك
وإبن سلول يقوللى كُر
وأنا مسئول
معاك الأوس والخزرج
وسيبت الخوزه تتدحرج
دماغى رافضه تحملها
وعينى تقول
بتحجب عنى شمس الصبح
وقبل الحرب
سألنا موسكو والرومان
سألنا كمان ملوك الجان
سألنا اللات والعزى
سألنا البغل والعنزه
وكله قال حتنتصروا
وحتى رملك المضروب
طلع كداب
وخاف لو قال حتنهزموا
دخلت الحرب
بلا خطه تقدمنى
ولا بوصله ترجعنى
عمودى الفقرى يوجعنى
عشان فقرى
وانا فى زحمة الاحداث
ماشحمتوش
وسيبته لحد ما صدا
وليلة الحرب
سِهِر ابوجهل مع ورده
يحطوا خطه لجل النصر
وقبل العصر
سمعت فى كل اعلامك
حاجات خايبه وكدابه
تقول انى
والف كمان من الغربان
وألف أُسُوده وديابه
وبعد العصر
وكثبانك بتبلعنى
سمعت إذاعتك الغاليه
محطة شرقنا الاوسط
وفى التلفاز
أبوسفيان بيتنحى
وانا بغرق
أنا بغرق
أنا بغرق
وبسمع صوتك الشادى
لقد نجا .. لقد نجا .. لقد نجا
وصدقتك ..
وعشت العمر مستنى..
وكان وعدك..
تهنينى وتتهنِّى..
وتسعدنا أمانينا..
ولو ليلى فى مره يطول..
رح اسهر فى سَنَا بدرك..
ولو شمسى دفاها يزول ..
يدفينى حنان صدرك..
دنا عاشقك ..
وبعشق كل أحلامك..
وبحضن كل أيامك ..
بأزهارها مع شوكها ..
وبشبكها ..
على صدرى ..
يهون عمرى ..
وتفضل وردتك باقيه ..
بتروى لى عطش الايام..
وتزرع فى صحارى الروح..
منين مابروح ..
ورود وزهور ..
وتفرش نور ..
بسكة دربى لو عتِّم ..
وتروينى كما ساقيه ..
وتبقى البلسم الشافى ..
لجرحى لمَّا بتألم..
وتروينا مع الحكايات ..
حكاية عشقنا النادره ..
أنا عاشق ..
وليه انتى اللى موش قادره ..
بمد الروح على دربك ..
واقول خطِّى ..
وبنقش لك على النجمات ..
حروف إسمك ..
وازوَّق لك حروف خَطِّى ..
وليه تِخْطِى..
وليه وعدك كأنه ماكان ..
وليه ترمينى فى النسيان ..
بدرب البعد بتسابقى ..
وما تِبْطِى..
ودَوِّبتى سنينى ضياع..
بعالج فى عوج خطوك..
وما طِبْتى ..
وانا عاشقك ..
وعشقك فجرى وغروبى ..
وأكلى ومشربى وتوبى ..
وهو قسمتى فى دهرى ..
ولو ضهرى ينقسم منك ..
ولو جرحى يكون فرحك ..
حقول لك إفرحى أكتر ..
ولا مره حقول تُوبى ..
وازود فى سطور فرحك ..
وأحرم منها مكتوبى ..
يا بايعانى وانا شارى ..
بحبك مهما نتباعد ..
ومهما تزيدى فى مرارى ..
ومهما بعدت عن دارى ..
ومهما تعاندى وتكابرى ..
أنا عاشق يا طول صبرى ..
بصبَّر قلبى فى بعادك ..
واقول بكره حنتواعد ..
تعبتينى وريَّحتك ..
قهرتينى وناصرتك ..
ظلمتينى ما حاسبتك ..
وما سيبتك ..
تسيرى فى الدروب وحدك ..
ولو كنتى فى حياتى حد..
أنا سَبْتِكْ..
وثابتك فى فصيلة الدم ..
ودمى سال على توبك ..
فِدَا عرضك ..
أنا فى عرضك ..
تلمينى من التوهَه..
وتاخدينى فى أحضانك..
ولفينى بدَفَا شالك ..
وبشمالك ..
تضمينى على يمينك ..
وما ترمينى فى الاحزان ..
وما تخللينى يوم أبقى ..
أسير سجَّان ..
دنا عاشق ..
قسم ضهرى ..
صكوك دينك ..
وطول العمر مستنى ..
تهنينى وتتهنى ..
واقول إمتى حييجى اليوم ..
وتفتكرى بإنك يوم ..
وعدتينى ..
وصدقتك ..
يحيى زكريا
لما مراته ولدت عيل
سماه يحيى
يمكن يحيا
لما قالوله اهتف للثوره
قال فلتحيا
لما قالوله اهتف للريس
قال فليحيا
لما قالوله بيتكم فين
تاه فى الناحيه
واحد غيرك لأ موش انت
كان من صغره
راكب مهر الحلم الجامح
دايما رامح
كان متصالح ويا الدنيا و ويا الثورة
أيها ثوره
وايها حركه فيها البركه
لما قالوله
ان الثوره حتصنع حلم
لأ مش حلمك
حلم سيادته ويا سيادته
اصل عبيد الثوره ف لحظه
بقوا أسياد
وانت فضلت محلك سر
نفس الفقر ونفس الحاله
كالمعتاد
واحد غيرك لأ موش انت
لابس كاكى وحالق اقرع
جواه الذل بيتمطع
ماشى مطاطى وشايل عار
لا مش عارك
واحد غيرك لا موش انت
جاب العار وجاب النكسه
جاب الذل وجاب الوكسه
وانت لوحدك شيلت الحمل
حتى كاتينا طارت منك
لما خطبها بلدياتها
واتجوزها وراحوا اتينا
حتى سكينه
بنت عليش جرسون القهوه
قالت مش ممكن حتجوز
واحد جاى هربان من سينا
واحد غيرك لأ موش انت
لا بس كاكى وحالق اقرع
جواه الفرحه بتتمطع
والافرول المكوى حينطق
والجزمه اللمعانه بتبرق
غاسل عاره وبردت ناره
والدنيا بتحكى ف اخباره
واحد غيرك لأ موش انت
بعد كاتينا وبعد سكينه
لما قالوله خد بخاطرها
خد بخاطرها
خلف منها عزه ونصر
واحد غيرك لا موش انت
ماشى مبهدل
كل هموم الدنيا وشايل
حاله المايل
ما بيتعدل
كان مستنظر
مجد كبير للوطن الاكبر
بص وشاف الوطن اتبعتر
دمه اتعكر
لما ولاده فى يوم سألوه
ليه متكدر
دور وشه
مالقاش ناحيه
واحد غيرك لأ موش انت
عاش القصه
واحد غيرك اسمه يحيى
يحيى زكريا
إمتى عينيكى الجارحه وسارحه تبطل حبه شغل ال ..
الله يعينك بس تراعى قلوب ال ..
ناس تعبانه تخبى همومها
جوه هدومها وليه حنلومها
لقلة نومها ماحنا كمان ما بنعرف ..
نوم العازب والمتجوز كله مبوز
واما نشوف الحلم نأوز
اصل الحلم بييجى ..
كابوس كاتم فوق أنفاسنا ومكربسنا
ومحَرْوِسْنا ومخللينا نبيع
اكبادنا ويا ولادنا
لجل ما نلقى بصله و..
دش مسلطح فوق فى سطوحنا
بيسحطحنا ويسلطحنا
ويعلمنا فن ال ..
غش حقيقى يبقى حقيقى
لما نصدق ان عيشتنا
حلوه وبيتنا فيه ال ..
خير انشالله يا بو عبدالله
قوم اتسلطن واوعى البانجو
يكون متسرطن
وادخل فى الغيبوبه وطنطن
محلاها رحابك يا وطنطن
واما يفوق يتشعلق تانى
فى حبال الامل المنحوله
يتشطر وتبان له رجوله
يضرب فى مراته وفى عياله
لجل تكون فى تاريخه بطوله
ومراته بترعب فى عياله
تحكى لهم حدوتة ال ..
غوله اللى اسمها امريكا
يا جميل القمح بتديكا
مش رداً لجميل والديكا
اللى فى المتحف انتيكا
أو غاويه بتريح معاليكا و..
ما علينا اوعى الحدوته
تطلع فى الاخر ملتوته
ماهى برضو فى كتاب محطوطه و ..
مكبوته الآهه فى حلوقنا
من كتر همومنا وبحلقنا
خرَّمنا ودانَّا وحلقنا
والوالى الطامع فى حلقنا
فى بحور الفقر مزحلقنا و..
لف لسانى سبع لفات
والتعلب من بدرى ما فات
قلت دا مات
لكن سابنى استنى ساعات
جه من خلفى
بهدل خَلَفى الاحياء ويا ال..
أموات الناس الساكته وراضيه
وماشيه جنب الحيط
اموات موش ناقص بس باشا الا التحنيط
ناس فى الشارع مالها ملامح
لونها الكالح كالتوابيت
واحد اعمى وواحد اطرش تالت اخرس
والرابع صدقنى عبيط
ماشى بدندن
اضحك كركر اوعى ت..
كشر لاحسن ع القسم حتتجرجر
تتهان وكرامتك تتبعتر
والتهمه جنابك بتفكر
تفكيرك بعبع للعسكر
ابطال الثوره الشعبيه
والنكته اللى اسمها..
حريه ما ضاعت يا عنيه
فيه ناس لمحوها الفجريه
واخداها وزارة الداخليه
من بعد السين وبعد الجيم
ليه يا بهيه من غير ديَّه
سبتينا لشلة حراميه
لجل تفوزى بخدمة غز
اخرتها تتكافئى بعلقه
وسكينه فى قلبك حتغز
مالك ضايع وابنك جايع
طز فى طبخه تخرب بيتى
تبور غيطى او تقفل لى باب دكان
وتخلينى أمد كفوكى
واتسلف حق الدخان
ياللا يا غاليه نفضى توبك
وارمى ذنوبك ايه حينوبك
لو دامت شمس الاحزان
لمى عيالك صوت موالك
تانى يلعلع لما حيرجع نور الفجر
واما عينيكى الجارحه وسارحه
تبطل حبه شغل ال...
يحيى زكريا
بحبك وحفضل أحبك كمان واقيد لك شموعك واكون شمعدان دى نظرة عيونك بتهوس خلايق على كبر سنى تطبطب تسمى وتعمل لى كشرى ونابت يا عمى وفته و كوارع ترمم لى عضمى وبنت الجيران تفور لى دمى عيونها بتبعت رسايل لصاحبى فى حكمه لجدى ولعبه لوليدى رساله وجايه تشعلل بريدى تقوللى بحبك وواحد صعيدى يقوللى انا تايه فى عرضك يا سيدى تعرفنى فين .. طريق الحسين وبوصف له وصفه توديه اليونان بحبك فى زنه وقرصة ناموسه ونسمة عصارى بتحمل لى بوسه يا ماحلا شفايفك حبيبتى يا نوسه دا كل اللى شافك بتحصل له حوسه دى حادثه وقالوا سببها جاموسه بحبك بهيمه وشالت جريمه واحب اما اقابلك على المزلقان بحبك صبيه تحنى الضفاير وعيل بيرسم يشخبط دواير وراجل مكحكح بيدهن سراير وعشه وفيللا وأجدد عماير وزفة عروسه وعركة ضراير وجوزه وشيشه وافخم سجاير وجون لابن متعب فى ماتش الجزاير ملانا بفرحه وخلانا نصحى سهرنا يا روحى لحد الأدان بحبك شواربى واحبك فى موسكى واحبك بتجرى واحبك تزُكِّى واحبك أكيده واحبك تشكى واحبك بخيله واحبك تزَكى وغنوه تفرَّح وقصه تبكِّى واحبك أصاله واحبك تعكى واحبك ذكيه واحبك غبيه يا غاليه وعاليه بطول الزمان
بحبك طيابه واشوفك كأمى
بحبك حبيه بتسرى ف وريدى